1ܒܲܣ ܦܲܪܦܘܼܠܹܐ ܝܘܸܢ ܒܝܼܵܘܟܼܘܿܢ؛ ܐܵܢܵܐ ܐܲܣܝܼܪܵܐ ܒܡܵܪܲܢ؛ ܕܚܵܕܪܝܼܬܘܿܢ ܕܵܐܟܼܝܼ ܕܚܵܫܚܵܐ ܠܩܪܵܝܬܵܐ ܕܦܸܫܠܵܘܟܼܘܿܢ ܩܸܪܝܹܐ؛ 2ܒܟܠܵܗ̇ ܡܵܟܝܼܟܼܘܼܬܵܐ ܕܚܝܼܵܠ؛ ܘܢܝܼܚܘܼܬܵܐ؛ ܘܡܲܪܝܲܟܼܬܵܐ ܕܒܹܢܵܐ؛ ܘܗܵܘܝܼܬܘܿܢ ܒܸܚܡܵܠܵܐ ܚܲܕَ ܠܗ̇ܘ ܐَܚܹܪَܢܵܐ ܒܚܘܼܒܵܐ؛ 3ܘܗܵܘܝܼܬܘܿܢ ܚܵܒܛܵܢܹ̈ܐ ܠܸܢܛܵܪܵܐ ܚܕܵܝܘܼܬܵܐ ܕܪܘܼܚܵܐ ܒܚܠܵܨܵܐ ܕܫܠܵܡܵܐ. 4(ܐܝܼܬ) ܚܲܕَ ܦܲܓܼܪܵܐ؛ ܘܚܕܵܐ ܪܘܼܚܵܐ؛ ܕܵܐܟܼܝܼ ܕܦܸܫܠܵܘܟܼܘܿܢ ܩܸܪܝܹܐ ܒܚܕܵܐ ܗܹܒܼܝܼ ܕܩܪܵܝܬܵܘܟܼܘܿܢ؛ 5ܚܲܕَ ܡܵܪܝܵܐ؛ ܚܕܵܐ ܗܲܝܡܵܢܘܼܬܼܵܐ؛ ܚܕܵܐ ܡܲܥܡܘܿܕܝܼܬܵܐ؛ 6ܚܲܕَ ܐܲܠܵܗܵܐ ܘܒܵܒܵܐ ܕܟܠ؛ ܘܥܲܠ ܟܠ؛ ܘܒܝܼܸܕ ܟܠ؛ ܘܒܟܠܵܝܗܝ. 7ܐܝܼܢܵܐ ܠܟܠ ܚܲܕَ ܡܸܢܲܢ ܦܸܫܠܵܗ̇ ܝܘܼܗَܒܼܸܠܬܵܐ ܫܵܦܵܩܲܬ ܐܲܝܟܼ ܟܝܼܘܼܠܵܐ ܕܚܲܠܥܲܬܹܗ ܕܡܫܝܼܚܵܐ. 8ܣܵܒܵܒ ܕܐܵܗܵܐ ܒܹܐܡܵܪܵܐ ܝܠܹܗ؛ ܐَܣܸܩܠܹܗ ܠܡܪܵܘܡܵܐ ܘܣܠܸܒܠܹܐ ܣܠܵܒܬܵܐ؛ ܘܝܘܼܗَܒܼܸܠܹܗ ܚܲܒܲܥܬܹ̈ܐ ܠܒܢܲܝ̈ܢܵܫܵܐ. 9ܐܝܼܢܵܐ ܕܐَܣܸܩܠܹܗ؛ ܡܘܼܕܝܼ ܝَܠܵܗ̇ ܐܸܠܵܐ ܐܸܢ ܕܐܘܼܦ ܨܠܹܠܹܗ ܩܵܕ݇ܡܵܝܬܵܐ ܠܣܵܡܹ̈ܐ ܬܲܚܬܵܝܹ̈ܐ ܕܐܲܪܥܵܐ؛ 10ܗ̇ܘ ܕܨܠܹܠܹܗ؛ ܗܲܪ ܐܵܗܵܐ ܝܠܹܗ ܐܘܼܦ ܗ̇ܘ ܕܐ݇ܣܸܩܠܹܐ ܠܥܸܠܸܠ ܡ̣ܢ ܟܠܵܝܗܝ ܫܡܲܝܹ̈ܐ؛ ܕܡܵܠܹܐ ܗ݇ܘܵܐ ܟܠ. 11ܘܗ̇ܘ ܝܘܼܗَܒܼܸܠܹܗ؛ ܚܲܕَܟܡܵܐ؛ ܫܠܝܼܚܹ̈ܐ؛ ܘܚܲܕَܟܡܵܐ؛ ܢܒܼ̈ܝܼܹܐ؛ ܘܚܲܕَܟܡܵܐ؛ ܡܲܫܚܸܕܵܢܹ̈ܐ؛ ܘܚܲܕَܟܡܵܐ؛ ܪ̈ܵܥܝܹܐ ܘܡܲܠܦܵܢܹ̈ܐ؛ 12ܠܡܲܟܡܲܠܬܵܐ ܕܩܲܕܝܼܫܹ̈ܐ؛ ܠܦܘܼܠܚܵܢܵܐ ܕܚܸܠܡܲܬ؛ ܠܒܸܢܝܵܢܵܐ ܕܦܲܓܼܪܵܐ ܕܡܫܝܼܚܵܐ؛ 13ܗܲܠ ܕܡܵܛܵܚ ܟܠܲܢ ܠܚܕܵܝܘܼܬܵܐ ܕܗܲܝܡܵܢܘܼܬܵܐ؛ ܘܕܝܕܹܥܬܵܐ ܕܒܪܘܼܢܹܗ ܕܐܲܠܵܗܵܐ؛ ܠܐ݇ܢܵܫܵܐ ܟܵܡܝܼܠ؛ ܠܟܝܼܘܼܠܵܐ ܕܩܘܼܡܬܵܐ ܕܬܲܡܵܡܵܬܘܼܬܹܗ ܕܡܫܝܼܚܵܐ؛ 14ܕܐَܚܹܪ݇ܢܵܐ ܠܵܐ ܗܵܘܵܚ ܝܵܠܹ̈ܕَܐ؛ ܡܘܼܫܥܸܫܹܐ ܠܐܵܗܵܐ ܓܹܒܵܐ ܘܠܗ̇ܘ ܓܹܒܵܐ؛ ܘܫܘܼܢܝܹܐ ܠܟܠ ܦܵܘܚܵܐ ܕܝܘܼܠܦܵܢܹ̈ܐ؛ ܒܦܸܠܡܵܐ ܕܒܢܲܝ̈ܢܵܫܵܐ؛ ܒܦܲܢܕܘܼܬܵܐ ܠܒܼܘܼܨܵܐ ܕܡܲܚܠܲܛܬܵܐ؛ 15ܐܸܠܵܐ ܗܵܘܵܚ ܫܲܪܝܼܪܹܐ ܒܚܘܼܒܲܢ؛ ܘܓܲܪܘܸܣܵܚ ܒܝܼܹܗ ܒܟܠ ܡܸܢܕܝܼ؛ ܗ̇ܘ ܕܝܼܠܹܗ ܪܹܫܵܐ؛ ܡܫܝܼܚܵܐ؛ 16ܕܡܸܢܹܗ ܟܠܹܗ ܦܲܓܼܪܵܐ ܦܝܵܫܵܐ ܝܠܹܗ ܡܘܼܪܟܸܒܼܵܐ ܘܟܬܝܼܪܵܐ ܡܸܚܕܵܕܹ̈ܐ ܒܟܠܵܝܗܝ ܓܲܝܹ̈ܐ ܕܗܲܝܲܪܬܵܐ؛ ܐܲܝܟܼ ܡܲܥܒܲܕܬܵܐ ܒܡܫܘܼܚܬܵܐ ܕܟܠ ܚܲܕَ ܣܵܡܵܐ؛ ܘܒܸܥܒܼܵܕܵܐ ܝܠܹܗ ܓܲܪܘܲܣܬܵܐ ܕܦܲܓܼܪܵܐ ܠܒܢܵܝܬܹܗ ܒܚܘܼܒܵܐ. 17ܐܝܼܢܵܐ ܐܵܗܵܐ ܒܹܐܡܵܪܵܐ ܝܘܸܢ ܘܒܸܣܗܵܕܵܐ ܝܘܸܢ ܒܡܵܪܝܵܐ؛ ܕܡܵܐܕܝܼܵܐ ܠܵܐ ܗܵܘܝܼܬܘܿܢ ܒܸܚܕܵܪܵܐ ܐܲܝܟܼ ܛܵܝܸܦܹ̈ܐ ܐܚܹܪ݇ܢܹܐ ܕܒܸܚܕܵܪܵܐ ܝܢܵܐ ܒܣܪܝܼܩܘܼܬܵܐ ܕܚܝܼܵܠܵܝ̈؛ 18ܘܚܘܼܒܼܝܵܢܹ̈ܐ ܝܢܵܐ ܒܦܲܪ̈ܡܵܝܬܵܝ؛ ܘܢܘܼܟܼܪ̈ܵܝܹܐ ܝܢܵܐ ܡ̣ܢ ܚܲܝܹ̈ܐ ܕܐܲܠܵܗܵܐ؛ ܣܵܒܵܒ ܠܲܝܬ ܒܝܼܵܝܗܝ ܝܕܹܥܬܵܐ؛ ܘܣܵܒܵܒ ܕܩܸܫܝܘܼܬܵܐ ܕܠܸܒܵܝܗܝ؛ 19ܐܵܢܝܼ ܕܩܛܸܥܝܹܐ ܝܢܵܐ ܡ̣ܢ ܪܥܵܫܬܵܐ؛ ܘܣܘܼܦܹܠܘܿܢ ܓܵܢܵܝܗܝ ܠܦܲܚܙܘܼܬܵܐ؛ ܘܠܦܘܼܠܚܵܢܵܐ ܕܟܠܵܗ̇ ܛܲܢܦܘܼܬܵܐ ܒܒܲܕܢܲܦ̮ܣܘܼܬܵܐ (ܒܛܲܡܲܥܟܵܪܘܼܬܵܐ). 20ܐܝܼܢܵܐ ܐܲܚܬܘܿܢ ܗܲܕܟܼܵܐ ܠܵܐ ܝܠܸܦܠܵܘܟܼܘܿܢ ܠܡܫܝܼܚܵܐ؛ 21ܐܸܢ ܒܬܪܘܼܨܬܵܐ ܩܲܡ ܫܲܡܥܝܼܬܘܿܢ ܠܹܗ؛ ܘܒܝܼܹܗ ܦܸܫܠܵܘܟܼܘܿܢ ܡܘܼܠܦܹܐ؛ ܐܲܝܟܼ ܕܝܼܠܵܗ̇ ܣܲܪܲܣܬܘܼܬܵܐ ܒܝܼܫܘܿܥ؛ 22ܡܲܢܚܸܝܼܬܘܿܢ ܡܸܢܵܘܟܼܘܿܢ؛ ܐܲܝܟܼ ܚܕܵܪܵܘܟܼܘܿܢ ܩܵܕ݇ܡܵܝܹ̈ܐ ܠܒܲܪܢܵܫܵܐ ܥܲܬܝܼܩܵܐ ܕܒܸܚܪܵܒܼܵܐ ܝܠܹܗ ܒܫܲܗ݇ܘܲܬܝܵܬܹ̈ܐ ܕܚܸܠܛܘܼܢܝܘܼܬܵܐ؛ 23ܘܕܦܵܝܫܝܼܬܘܿܢ ܚܘܼܕܸܬܹܐ ܒܪܘܼܚܵܐ ܕܚܝܼܵܠܘ̈ܟܼܘܿܢ؛ 24ܘܠܵܒܼܫܝܼܬܘܿܢ ܠܒܲܪܢܵܫܵܐ ܚܵܕ݇ܬܵܐ؛ ܗ̇ܘ ܕܒܲܐܠܵܗܵܐ ܦܸܫܠܹܗ ܒܸܪܝܵܐ ܒܙܲܕܝܼܩܘܼܬܵܐ ܘܒܩܲܕܝܼܫܘܼܬܵܐ ܕܣܲܪܲܣܬܘܼܬܵܐ. 25ܣܵܒܵܒ ܕܐܵܗܵܐ ܡܲܢܝܸܚܘܿܢ ܡܸܢܵܘܟܼܘܿܢ ܕܵܓܵܠܘܼܬܵܐ؛ ܘܗܲܡܙܸܡܘܿܢ ܣܲܪܲܣܬܘܼܬܵܐ ܐ݇ܢܵܫܵܐ ܥܲܡ ܫܒܼܵܒܹܗ؛ ܣܵܒܵܒ ܗܲܕܵܡܹ̈ܐ ܕܚܲܕَ ܕܗ̇ܘ ܐَܚܹܪَܢܵܐ ܝܘܵܚ. 26ܟܪܘܿܒܘܿܢ ܘܠܵܐ ܚܵܛܝܼܬܘܿܢ؛ ܘܫܸܡܫܵܐ ܥܲܠ ܟܲܪܒܵܘܟܼܘܿܢ ܠܵܐ ܓܵܢܹܐ؛ 27ܘܠܵܐ ܝܵܗ݇ܒܼܝܼܬܘܿܢ ܕܘܼܟܵܐ ܠܐܵܟܼܹܠܩܲܪܨܵܐ. 28ܗ̇ܘ ܕܓܵܢܸܒܼ ܗ݇ܘܵܐ ܡܐܵܕܝܼܵܐ ܠܵܐ ܓܵܢܸܒܼ؛ ܐܸܠܵܐ ܡܒܵܕܵܠ ܕܗܵܕܵܐ ܓ̰ܲܗ݇ܝܹܐ؛ ܟܲܕ ܦܵܠܸܚ ܒܐܝܼܕܵܬܘܼ̈ܗܝ ܛܵܒܼܵܬܹ̈ܐ؛ ܕܗܵܘܹܐ ܠܹܗ ܠܝܼܵܗ݇ܒܼܵܐ ܠܗ̇ܘ ܕܝܼܠܹܗ ܣܢܝܼܩܵܐ. 29ܟ̰ܘܼ ܗܹܡܸܙܡܵܢ ܣܪܝܼܬܵܐ ܡ̣ܢ ܦܘܼܡܵܘܟܼܘܿܢ ܠܵܐ ܦܵܠܛܵܐ؛ ܐܸܠܵܐ ܗ̇ܝ ܕܝܼܠܵܗ̇ ܫܵܦܝܼܪܬܵܐ ܐܲܝܟܼ ܠܒܸܢܝܵܢܵܐ ܕܣܢܝܼܩܘܼܬܵܐ ܗܵܘܝܵܐ؛ ܕܝܵܗ݇ܒܼܵܐ ܫܵܦܵܩܲܬ ܠܐܵܢܝܼ ܕܫܲܡܥܝܼ. 30ܘܠܵܐ ܡܲܦܫܸܡܝܼܬܘܿܢ ܠܪܘܼܚܵܐ ܩܲܕܝܼܫܵܐ ܕܐܲܠܵܗܵܐ؛ ܕܦܸܫܠܵܘܟܼܘܿܢ ܡܸܚܝܹܐ ܡܵܘܗܪ ܒܝܼܹܗ ܠܝܵܘܡܵܐ ܕܦܘܼܪܩܵܢܵܐ. 31ܟܠܵܗ̇ ܡܲܪܝܪܘܼܬܵܐ؛ ܘܟܲܪܒܵܐ ܘܪܘܼܓܼܙܵܐ؛ ܘܩܲܠܡܵܩܵܠ؛ ܘܓܘܼܕܵܦܵܐ؛ ܦܵܝܫܝܼ ܫܩܝܼܠܹܗ ܡܸܢܵܘܟܼܘܿܢ؛ ܥܲܡ ܟܠܵܗ̇ ܒܝܼܫܘܼܬܵܐ؛ 32ܘܗܵܘܝܼܬܘܿܢ ܒܵܣܝܼܡܹ̈ܐ ܚܲܕَ ܠܟܸܣ ܗ̇ܘ ܐ݇ܚܹܪ݇ܢܵܐ؛ ܘܡܪ̈ܲܚܡܵܢܹܐ؛ ܒܸܫܒܼܵܩܵܐ ܚܲܕَ ܠܗ̇ܘ ܐ݇ܚܹܪ݇ܢܵܐ؛ ܕܵܐܟܼܝܼ ܕܐܲܠܵܗܵܐ ܒܡܫܝܼܚܵܐ ܫܒܼܸܩܠܹܗ ܐܸܠܲܢ.